പ്രണയമേ, നീ എന്നിലേക്ക് മടങ്ങുന്നിടത്തോളം നിൻ്റെ നീണ്ട യാത്രകൾ എനിക്ക് സമ്മതമാണ്.....

ഹൃദയപൂർവ്വം, 

വിജിത

 

രാത്രിമഴ വീണ്ടുമെത്തുന്നു എൻ ജനാലയ്ക്കരികിൽ, 

എന്തേ മറന്നതെന്ന് പരിഭവം പറയ്‌കയാമോ അവൾ? 

അതോ എന്നെ അറിയാത്ത എന്നെ നോക്കി ചിരിക്കുന്നതോ? 

എന്താകിലും കൂട്ടായ് നിൽക്കുന്നു അവളെനിക്കിന്നും....

ഹൃദയപൂർവ്വം, 

വിജിത

 എൻ്റെ കയ്യിൽ നിനക്കായൊരു പ്രണയലേഖനമുണ്ട്, 

പ്രണയാതുരയായ ഒരുവൾ തന്നയച്ചത്; 

നിന്നോട് പറയാൻ അവൾ തന്ന സന്ദേശത്തിന്,

ഇപ്പോഴും ഹൃദയ തുടിപ്പിൻ്റെ താളമുണ്ട്. 

പ്രണയത്താൽ അവൾ വിവശയാണ്,

ലോകത്തെ അവൾ കാണുന്നില്ല; 

നിൻ്റെ ആലിംഗനത്തിൻ്റെ ഓർമയിൽ 

അവളുടെ ശരീരമിന്നും വിറയ്ക്കുന്നുണ്ട്. 

നീ നൽകാതെ കാത്തുവെച്ച ചുംബനങ്ങളുടെ ഓർമ്മ, 

അവളെ വല്ലാതെയലട്ടുന്നു. 

രാത്രിയുടെ യാമങ്ങളിൽ അവളുടെ കാതുകൾ,

കാലൊച്ചകൾക്കായി കാതോർക്കുന്നു..   

നിൻ്റെ താളലയങ്ങളിലിന്നും അവൾ

തൻ്റെ ഹൃദയതാളം കണ്ടെത്തുന്നു; 

ഒടുവിലായ്, അവൾക്കായി മാത്രം നീയൊരു - 

പ്രേമരാഗം മീട്ടുമെന്നവൾ ആശിക്കുന്നു... 

നീ അവൾക്കായി വരികയില്ലെന്നറിഞ്ഞിട്ടും 

അവളിന്നും പ്രണയാതുരയാണ്.. 

നിൻ്റെ സ്വപ്നങ്ങളിൽ അവൾ എത്താറുണ്ടെന്ന്, 

എന്നോടവൾ സത്യം ചെയ്തതാണ്! 

സൂര്യോദയത്തിൽ തൻ്റെ സ്വപ്നം -

 തകരുമെന്നറിഞ്ഞാവണം,

അവളെന്നെയീ രാവിൽ പറഞ്ഞയച്ചത്, 

അവളത്രമേൽ പ്രണയത്താൽ വിവശയാണ്!

വിശ്വസ്തതയോടെ,

ഒരു ഹംസം