മനസ്സിൻ്റെ കോണിൽ എവിടെയോ മാറാല പിടിച്ച ചില ചിന്തകൾ ഉണ്ട്, പൊടിപിടിച്ച പഴയ കുറച്ചു സ്വപ്നങ്ങളും... 

എന്നെങ്കിലും അവയൊന്ന് പൊടി തട്ടിയെടുക്കണം, എന്നിട്ട് തൂക്കി വിൽക്കണം..!

ഹൃദയപൂർവ്വം,

വിജിത 

 യാത്രാമൊഴികളിൽ വിശ്വസിക്കുന്നില്ല ഞാൻ... 

വെറുതെ അങ്ങ് പോവുക;

 ആരും അറിയാതെ, ആരോടും ഒന്നും പറയാൻ നിൽക്കാതെ.....

ബാക്കി വെച്ചതെല്ലാം ബാക്കിയാക്കി വെറുതെ അങ്ങ് കടന്നുകളയുക!! 

ഞാൻ ഒരു നിഗൂഢതയായി തുടരട്ടെ...

ഹൃദയപൂർവ്വം,

വിജിത 

 മരിച്ചാൽ അരികിലൊരു വാകമരം നടണം, പിന്നെയുള്ള ഓരോ മഴയിലും കൊഴിഞ്ഞു വീഴുന്ന പൂക്കൾ കൊണ്ടവിടം ചുവക്കണം... 

അങ്ങനെ നിങ്ങൾ കെടുത്തികളഞ്ഞ അഗ്നിയെ വീണ്ടുമൊന്നോർക്കണം.. മരണത്തിനപ്പുറമെങ്കിലും!

ഹൃദയപൂർവ്വം,

വിജിത 

ഞാനെന്ന വരി

 കാലമേ, നീ എഴുതാതെ പോയ കാവ്യങ്ങളിൽ ഭാഗമാകുവാൻ ഞാനെന്ന വരി കാത്തിരിക്കുന്നുവിന്നും ....

നീ കോറിയിടുമാ വാക്യശകലങ്ങളിൽ തിരയുന്നു ഞാൻ 

ഇന്നുമെൻ ആത്മാവിനെ...

ഹൃദയപൂർവ്വം,

വിജിത

 കാണ്മാൻ കഴിയാത്ത ദൂരങ്ങൾ എനിക്കും നിനക്കുമിടയിൽ തീർത്ത അകലമുണ്ടെങ്കിലും നീയും ഞാനുമെൻ്റെ സ്വപ്നലോകങ്ങളിൽ ഒന്നിക്കാറുണ്ട്,

 ഒരുമിച്ചിരുന്ന് കളി പറയാറുണ്ട്, 

ഒരിക്കലും പിരിയാതെ കൈകളിൽ കൈ കോർത്ത് നടക്കാറുണ്ട്... 

കണ്ണെടുക്കാതെ പരസ്പരം വെറുതെ നോക്കിയിരിക്കാറുണ്ട്.. 

അവിടെ നീ എൻ്റേത് മാത്രമായിരിക്കുകയും നിൻ്റെ സംഗീതം എനിക്കായ് മാത്രം പൊഴിയുകയും ചെയ്യുന്നു.... 

അതുകൊണ്ട് വരൂ, 

നമുക്കു തനിയെ ഉറങ്ങി സ്വപ്നലോകങ്ങളിൽ വെച്ചു കണ്ടുമുട്ടാം;

 നമുക്കു മാത്രമറിയാവുന്ന നമ്മുടെ മാത്രം ഇടങ്ങളിൽ....

ഹൃദയപൂർവ്വം,

വിജിത